旧时泰康路

白话广州

天气渐凉，估计大家都收埋晒啲藤席藤枕喇。依家啲后生都系开空调避暑，冇乜几个再瞓藤席吹风扇。不过话时话，要买一张瞓起身凉爽舒服嘅藤席都唔系咁易。旧时买藤席，大家必定首选泰康路嘎。

依家嘅泰康路，系一条经营五金、洁具、灯饰嘅装饰材料专业街，呢个系佢“转型升级”之后嘅新面孔。以前，呢度系竹器藤器嘅世界。一百年前，大沙头、天成路、南关同南堤二马路都有竹栏，四乡运过嚟嘅竹就喺呢度埋街上岸。泰康路所在位置系广州南界，临近珠江，喺广宁、怀集过嚟嘅竹、篾青、葵片都喺呢度放排。后嚟泰康路城墙被拆，新开咗马路，竹藤棕草作坊开始成行成市。所以最早期嘅泰康路系一个以出售山货、竹木、藤器、草席为主嘅专业市场，当时沿街有41家山货竹器草席店，全市七成嘅同类店铺都喺呢度。

泰康路嘅山货竹器同草席好出名，据讲连香港人都慕名过来呢度买蒸笼米筛。而且坊间仲有一句歇后语：“泰康路——好篸（惨）”。篸，粤语“caam2”，指筲箕。字面意思，就系话泰康路出售嘅都系质优价廉嘅“好筲箕”。“篸”“惨”同音，所以就有咗呢句歇后语。◎李月婷 媒体人

新闻推荐

实中创新党员活动形式，根据特长成立文明实践服务团 党员教师每人年服务时长40小时

本报讯（记者陈慧）近年来，中山市实验中学摸索创新党员活动形式，成立党员教师十大文明实践服务团。昨日，实中党委书记、校长...