庙前署前之“前”
白 话广州
最近，广州东山庙前直街同埋署前路一大批房屋要征拆，引起各方关注。
署前路喺东山口地铁站嘅南边，系南北走向；庙前直街喺署前路南边，系东西走向。呢两条路有一个共同点，就系个名都有个“前”字，都系借某历史著名建筑嚟起名。睇嚟，旧时啲人亦识得“傍名牌”。
东山宜家系冇寺庙嘅，庙前直街嘅“庙”系指600几年前一个叫做韦眷嘅太监出钱起嘅东山寺，原址就喺宜家嘅越秀区图书馆嗰度。
当年嘅东山寺因时代变迁、年久失修等原因，一直都系破破烂烂，到咗上世纪80年代就拆咗，但留低咗好多同寺庙有关嘅路名，如寺右×马路、寺贝通津等。庙前直街因为喺正东山寺前面(南面)，所以起咗咁嘅名。
署前路个名同旧时嘅警察有关。话说民国时期嘅广州，警察局系叫做警察署，其中嘅东山警察署就喺宜家嘅东山公交总站，咁佢前面(西面)嗰条路，大家就叫做署前路。
有一种讲法，话外省人比较钟意署前路呢个名，因为普通话“署前”近音“数钱”，好意头。小弟认为，粤语读“署前”同样咁好听啫——“储钱”。“庙前”亦唔错呀，每秒都赚钱。呵呵呵，呢个“前”字有意思。◎阿六 律师
新闻推荐
体教融合系列报道1文/图广州日报全媒体记者孙嘉晖2020年9月，国家体育总局、教育部联合印发《关于深化体...