广州嘅枇杷

白 话广州

“三月梅四月李，五月桃仔出街企。”旧阵时经常听啲老人家唱呢两句顺口溜。春夏交替，广州唔少水果就排队上街。呢排，除咗梅仔、桑葚，仲有一样有益又好味嘅水果上市，佢就系枇杷。

新闻话，呢排从化嘅优质枇杷品种成熟啦，佢哋都系由广州嘅科学家培育出来嘅新品种，口感酸甜美味，而且睇照片，呢种枇杷十足一只鸡蛋仔咁大，表皮系纯净嘅金黄色，光睇个样，就可以想象里面有鲜嫩、甘甜、多汁嘅肉。

旧时我住喺乡村，唔少人家都会喺门前屋后种啲果树，枇杷就系好受欢迎嘅一种。每年成熟阵时，绿色嘅枝叶中间挂满咗黄灿灿嘅果实，唔单只引来蜜蜂、雀仔，绕住果实嗡嗡飞，仲引来咗三三两两“为食猫”——啲细路仔一得闲就会摘几只，有时连皮都一齐食。当然，家阵城市嘅街坊食枇杷，都系剥净皮先食，为咗口感好，仲避免啲残留农药。

枇杷系广州人熟悉嘅水果，唔单只好食，仲系一味珍贵嘅中药材。譬如清肺化痰嘅川贝枇杷膏，枇杷叶就系其中重要嘅成分。唔少街坊仲会用枇杷叶、枇杷花，甚至新鲜嘅枇杷果实来煲汤，搭配瘦肉、雪梨、冰糖或者老鸡，据说亦起到滋阴养生嘅功效。◎闻歌 媒体人

新闻推荐

一车主状告“查博士”侵犯隐私权 法院：案涉二手车历史车况信息不属于个人隐私

民法典学堂在当今互联网时代，“个人隐私保护”是我们要面临的问题。然而，在二手车服务平台，提供查询车辆历史信息的...