踏春去碧道

白话广州

周末经过海心沙，睇到呢度嘅河涌边已经整好咗一大段“红地毯”，即系塑胶跑道。原来呢度系二沙岛嘅碧道之一，唔少街坊喺呢度散步、睇花，又或者慢跑。

春江水暖，珠江同河涌边嘅碧道，鲜花好似约埋一起咁，争住盛放，粉紫色嘅宫粉紫荆、黄灿灿嘅黄花风铃木，仲有纯白色嘅木兰花，一个比一个养眼。佢哋穿插喺绿树或草丛中，空气散发住淡淡嘅清香。唔少街坊攞出手机，倚喺花旁，整个趣怪或者可爱嘅造型，映返张靓相。仲有啲一家几口出动，喺周围野餐，细路仔耍下玩具遥控车、跳下绳，都几惬意。

加阵正系广州最靓嘅时节之一，唔少街坊周末都钟意去户外转下，尤其系带住细路仔嘅，放松下。而碧道就喺屋企门口，或者唔远，正啱休闲踏春。之前有报道话，广州到旧年已经铺好咗500几公里嘅碧道，而且唔同区域嘅碧道，有唔同嘅主题，有啲突出生态特色，有啲展示广府水乡，有啲汇聚咗现代科技。有咁靓嘅地方观赏春色，系广州人嘅福气。

当然，有一点要提醒大家嘅系，碧道靠近水边，虽然已有防护措施，不过踏春时仲系要注意安全，尤其系带住细路，一定要睇紧啲喔。

◎闻歌 媒体人

新闻推荐

从3月3日至7月30日 机场高速机场收费站将实施临时交通管制

信息时报讯（记者成小珍通讯员机场宣）记者昨日从广东省公安厅机场公安局交通管理支队发布的通告中获悉，机场高速（机场收费站）将...