甜蜜婚纱街
白话广州
广州开始评选今年嘅“十大甜蜜榜单”。咩系“甜蜜”？当然系指拉埋天窗嘅人生大事啦。完成呢件大事有好多嘢要准备，摆酒啦，度蜜月啦。对好多女生嚟讲，最紧要嗰件，当然系拣婚纱喇。
当然，依家好多影楼都系一条龙服务，怕麻烦嘅，婚纱可以去嗰度慢慢拣。不过，话明系大事，估计冇边个愿意求其将就，梗要揾件啱身又啱心水嘅婚纱啦。呢个时候，好多人会谂起江南大道北嗰条“婚纱街”，有人又叫佢“幸福街”。
江南大道北嘅婚纱市场，从前进路口往北一路到珠江边，路两旁都系大大细细嘅婚纱铺。呢度嘅婚纱市场最早系由老华侨带动嘅——江南大道北系广州当时两条华侨大道之一，有啲有经济头脑嘅侨民利用屋企嘅花园草坪开起婚纱店，从前店后厂发展成当年全省最大规模嘅婚纱街。
虽然叫婚纱街，但呢度都有专门出售中式裙褂嘅店铺。其实都系照顾广州呢边嘅习惯，虽然越来越多人搞纯西式嘅婚礼，但上半场西式下半场中式嘅中西合璧婚礼依然都系主流。拣完婚纱再拣裙褂，依家仲可以连首饰珠宝伴手礼一齐搞掂添。
行呢段江南大道，每个人心里边都系甜嘅。你觉得佢可唔可以上榜呢？
◎李月婷 媒体人
新闻推荐
三地青年一起制作汤圆。信息时报记者陈引摄信息时报讯（记者陈子垤）“冬至”既是节气，也是中华民族传统节日。近日，广...