如厕好享受
白话广州
新闻话，广州而家构建咗市区廿分钟嘅“如厕圈”。“厕所革命”原计划对2240座公厕升级，而家已经完成咗4133座，完成率高达184.5%。
而家市民揾厕所，唔单止比以前更方便，而且公厕更靓、如厕更舒服。谂起好耐以前去公厕，唔少厕所冤崩烂臭，入去仲要俾钱，有啲两毫纸，商业区嗰啲就要五毫甚至一蚊。如果唔记得带厕纸，仲要帮衬埋“收费处”，买多包纸巾。人有三急嗰时，如厕就最狼狈啦，又要畅散纸，又要买纸巾，又要等位。
而家就唔同啦，啲公厕真系四围都系，特别喺老城区啲居住区域，有啲密集到直线距离五六十米就有一间。所以话，中心城区行廿分钟就可以搵到一间厕所，一啲都唔夸张。呢啲普通公厕都好干净企理，每日都有专人保洁。而喺景区，公厕就更加高级，有啲仲成咗网红打卡点，好似越秀公园入边嘅花卉馆厕所，远远就见到青砖绿瓦、岭南窗花，未行近仲以为系一个景点。入边啲配套都好齐全，厕纸、洗手液、挂钩、烘干机、扶手同埋面镜样样都有，仲有自动取纸机、太阳能灯，既高雅又智能。
当如厕都可以成为一种享受嘅时候，呢个城市嘅文明程度就可想而知啦。◎阮栩 编辑
新闻推荐
羊城晚报讯记者谭铮、实习生徐硕、通讯员越宣报道：从地方走向国际，广州北京路的文商旅融合创新发展引来多国文旅专家的...