火锅无文化？

信息时报 2019-01-09 01:16

白话广州

早前，美食家蔡澜参加一档电视节目，其间主持人就问：如果要一款食物消失，你最想系边款啊？蔡澜话：火锅系一种最无文化嘅料理方式，所以，咁就火锅啦。此言一出，好多打边炉（火锅）嘅拥趸都即时愕然。

须知道，蔡澜最早出名嘅地方系广府地区。喺呢个地方，中意打边炉嘅人有好多，其中就包括大家喜爱嘅“天王”郭富城。郭中意打边炉，主要系因为佢拥有一种热闹融洽嘅气氛，“同捞同煲”嘅感情。蔡澜成名于一个打边炉咁普遍嘅地方，却话打边炉无文化，难怪街坊难以接受啦。

其实，打边炉本身就系岭南市井文化嘅一部分。呢种饮食方式，最早诞生于街头搵食嘅咕喱之间。一班单身工友，夹份买餸打煲，食起来就会比一个人丰富得多，氛围亦更加温暖团结。于是，呢种方法好快被普罗大众所接受，而打边炉嘅“炉友”亦随之被称为“沙煲兄弟”，是谓“同甘苦，共患难”嘅意思。

万一遇到凶险，有人大去，平日一齐围炉嘅兄弟就会讲：“佢吊起咗个沙煲咯。”意思即系此人已归极乐，唔使再用沙煲了。言语间，既有悼念，亦有不舍与祝福。

长久以来，打边炉嘅种种讲法同埋当中包含嘅感情，早已融入岭南文化之中，成为街坊熟悉与倍感亲切嘅部分。如果咁样都唔算有文化，咁乜嘢先至叫做文化呢？

◎梁倩薇编辑

诚信建设万里行羊城晚报讯记者严丽梅报道：昨日记者从广东省税务局获悉，广州市税务机关近日以1户疑点企业为线索，联合公安部...