“吔”与“饩”
白话广州
早几日，喺荔湾区华贵路，听到两个阿叔嘅对话。一个问：吔咗饭未？另一个答：吔咗喇，宜家返档口饩鱼……
呢两位阿叔嘅对话，带出咗两个同食有关，但宜家好少人讲嘅粤语用词“吔”同“饩”。
“吔”粤语读音为yē，系食嘅意思，如吔饭、吔餸、吔嘢等。其实，喺粤语中，最早呢个字系一个常用字嚟嘅，因为用粤语讲“食”听起身有啲似蚀本嘅“蚀”。大家都知啦，广府人比较讲究好意头，所以就用古汉字“吔”代替食，并且系用于人，唔用于动物。但唔知从几时开始，“吔”俾人用作闹人嘅粗话，如“吔屎”、“吔蕉”等，咁大家就少用咗呢个字喇，宜家一般喺西关等老城区或喺TVB旧剧集里面，间中仲会听到“吔”嘅原意用法。
“饩”粤语同音“汽”，亦系一个古汉字，原意有几个意思：1.谷物；饲料。2.活的牲口；生肉。3.赠送（食物）。喺粤语中，呢个字同“喂”有相同嘅意思，都系指喂食，但喂食嘅对象唔同：“饩”系对动物，如饩鱼、饩雀、饩鸡等；“喂”系对人，如喂BB、喂饭等。但宜家，“饩”字亦慢慢少人讲喇，变咗唔理系人定系鸡，一律讲“喂”。
从呢两个字可以睇出，粤语中好多字系好严谨嘅，虽然同一个意思，但对人就用呢个字，对动物就用嗰个字，唔会人畜不分。
◎阿六 律师
新闻推荐
12月26日，广州市荔湾区反恐办联合荔湾区委政法委和区公安分局在西城都荟广场举办《中华人民共和国反恐怖主义法》大型宣传...