中山六考古
白 话广州
上个礼拜五，广州市文物考古研究院公布咗中山六路RJ-6/7地块嘅考古发现，佢就喺新宝利大厦嘅西侧，面积大概2400平方米。考古人员形容呢次发现到嘅文化遗存好丰富，文化层堆积最厚嘅有4米咁高，包括咗唐朝一直到民国嘅唔同历史时期。呢次考古发现，最引人注目嘅就系发现咗52个宋代嘅磉墩，讲明嗰时可能有比较宏大嘅建筑，考古人员猜测可能系官署宫殿或者寺庙。
其实，呢度出现呢啲文化遗存一啲都唔出奇。广州喺宋朝就扩建咗三个城区，中山六呢个位置啱好位于扩建嘅西城入边。西城主要系为咗保护新发展嘅商业区而扩建，规模系三城中最大，周长就有十三里咁多。而呢次考古嘅地块北边就系六榕寺。据讲，清朝嗰时，六榕寺嘅山门仲喺中山六路嘅位置上边。南朝开建嘅六榕寺，佢最开始嗰时就好大，据记载，当时呢度“横直绵亘实逾二里”，东至解放北路，北抵百灵路，西至海珠北路，南达中山六路。但系，寺庙从明代开始就慢慢缩水，而家广东迎宾馆嘅地块其实都系当时六榕寺嘅一部分。
今次发现到嘅磉墩，就好可能系以前六榕寺嘅建筑之一。不过，呢啲仲要等考古专家去证实。◎阮栩 编辑
新闻推荐
致中国建设银行中山市分行：2000年9月1日，我司与贵单位签订了《土地使用权转让协议书》，约定由我司向贵单位转让：1、...