日行西华路
白话广州
西华路出名，原因系食肆特别多，多福嘅鱼生、雄记嘅烧烤、红城嘅酸菜鱼……绝对可以称之为宵夜打趸一条街。不过，你有冇试过朝早行下呢条路上边嘅内街内巷呢？
西华路上边，仲有一样嘢比较多，就系学校多。四中、十一中（即系依家嘅南海中学）、八十二中，几间中学聚集喺短短几百米之内，大概只有培正七中先可以同佢“齐名”，更加唔使讲分布内巷嘅小学喇。而呢几间中学所在嘅地方都好得意——好似四中所在嘅金花直街，虽然叫“直街”，但佢唔系直嘅而系分成两截。从西华路呢边入，过一个斜坡行十分钟左右就行完第一截；然后穿过蟠虬南、斗姥前过芦荻西，入到第二截“直街”就可以直通中山七。据讲“金花”呢个地名系由“金花保子惠福夫人”呢个民间传说得来嘅，“金花”系指金花娘娘，以前金花街仲有金花庙，不过依家已经冇咗喇。
再讲下八十二中。喺西华路上边，呢间中学嘅变化最大。喺康王路未开路之前，呢间中学隐藏喺捶帽新街里边。呢条捶帽新街同样有段古。喺清朝中期，附近有唔少制作毡帽嘅商家，间间铺头都将帽放喺木模上边捶打，捶帽声成为特色，所以就叫“捶帽巷”。老八十二中有两幢教学楼，之前旧嘅红砖楼地下仲有几间工厂，依家应该都已经撤场喇。
◎李月婷 媒体人
新闻推荐
信息时报讯（记者蒋隽通讯员邰梦云）越秀区的街坊以后到社区卫生服务中心，就能接受专业的眼病筛查和诊治。日前，中山大学中山眼...