腊味与黄圃
白话广州
广州从周三晚黑开始降温，气温比之前起码低咗3~4度。有新闻讲，咁样嘅广州天气就符合“入秋”标准喇。
入秋喇，系时候食腊味啦。
广州人对腊味零舍钟意，无论系茶市定系饭市，以腊味做嘅茶点、菜式都有唔少，而市面上卖嘅各种广式腊味更加系好多师奶整“住家菜"必备食材。
话时话，大家又知唔知腊味系边度啲人发明嘅呢？答案系中山黄圃人。
黄圃系中山北部一个镇。相传光绪十二年，嗰年冬天特别冻，当地有一家黄姓老板开嘅卖肉档，啲猪肉卖唔出去，老板就谂咗个办法，将啲肉分两类，一类切碎用配料腌过入落啲猪肠衣里面，用水草一截截绑好；另一类就切成一条条成条腌好，之后攞出去晒干。后嚟发现，咁样整过嘅腊肠、腊肉唔单只味道正，而且仲可以保存好耐。呢种做法，后嚟喺整个黄圃镇传开，大家纷纷照板煮碗咁做，从始腊味就成咗当地一个传统特产。
广州“沧州”“八百载"呢啲名牌腊味店，据讲最早就系黄圃人嚟广州开嘅，而广州“皇上皇”、香港“荣华“腊味嘅制作，听讲亦曾专门请黄圃嘅腊味师傅嚟坐阵。
“秋风”起，食腊味，黄圃人应记一功。◎阿六 律师
新闻推荐
市民将拓片拍下留念。本报讯昨日，由市委宣传部、市社科联主办，市收藏家协会承办的“粤北古代石刻拓片展”在市图书馆一...