应元书院嘅古仔

白话广州

前两期我写咗应元路，呢条路同应元书院有好大渊源。而呢个应元书院（而家嘅二中），由佢创立嗰日开始，就出现咗好多巧合嘅古仔，令当时啲人津津乐道。

据讲应元书院嘅创始人系清代同治年间嘅广东布政使王凯泰，佢创办呢个书院系想广东多出几个状元，所以先取名“应元”。呢个书院建成之后嘅第一个会试，就真系圆了呢个愿望，有一个考生中咗状元。呢个考生叫做梁耀枢，字斗南。据当时坊间传说，呢个梁耀枢本嚟冇心上京去考试嘅，只不过因为书院会赞助差旅费，佢贪图免费上京旅游，就决定去考试。点知 ，佢最后真系高中咗状元，仲成为广东喺清代嘅第三个状元。

就系噉，应元书院“首战告捷”。当时，书院有一座奎文阁，上边嘅楹帖系：“三台奎耀临南极，八座文星拱北辰”。而奎文阁西面系仰山轩，都有一副楹帖，写住：“岳峙层霄，海内斯文尊北斗；雷鸣昨夜，天公有意属南州”。呢个考生嘅名“耀枢（北辰）”同字“斗南”，啱好都嵌入喺呢两幅楹联入边，好似未卜先知噉，“预告”咗呢个考生嘅名出嚟。

呢件事一传十十传百，应元书院嘅名气就逐渐大咗起身。◎阮栩 编辑

新闻推荐

首届广州粤港澳大湾区生物医药与健康圆桌峰会举办 大湾区具备打造全球医药科创中心优势

5月18日，在首届广州粤港澳大湾区生物医药与健康圆桌峰会举办期间，数十位院士、国医大师、专家学者、企业家共聚一堂，热议大...