硬净簕杜鹃
白话广州
广州刚刚入夏，周围啲花都开到墟墟撼撼。其中喺市内三四百座天桥上面，有一种花显得尤其抢眼：佢就系簕杜鹃。呢种花原产于南美，计正唔算系本土植物。但，点解佢会喺花城广州开得特别招摇呢？
其实，簕杜鹃有得今日嘅盛况，同2003年关系好大。嗰一年，广州创新布局天桥绿化。参与嘅技术人员就考虑：呢座城市地处亚热带，郁啲就话“入夏”。六七月份喺天桥上面，晒到五六十摄氏度都喺闲闲哋。咁嘅环境，选咩植物先可以顶得佢顺呢？经过一番调查之后，大家选中咗来自热带嘅簕杜鹃。
不过，嗰时嘅簕杜鹃，品质并无而家咁理想：花期短，只开三四个月；唔襟冻，低过5℃就好容易谢。所以，为咗等佢更好咁适应广州环境，变得更加硬净，技术人员又做咗好多改良，包括选种、施抗冻剂、研发专用泥土……就连灌溉系统都喺智能嘅，视乎具体情况，睇住来淋。簕杜鹃想唔生得靓都好难了。
一番辛苦，终有得着。而家，簕杜鹃喺广州已经从“两季有花，三季常绿”发展成“四季有花，四季常绿”，喺大街小巷中威风霸屏，装饰住每一个网红景点，亦骄傲咁诠释咗广州城市美化嘅创新与成就。
◎梁倩薇 编辑
新闻推荐
□李烈声[澳门]有一俗语:“拼死吃河豚。”河豚即广东人说的鸡泡鱼，这种鱼产于世界各地海洋，我在南美洲千里达...