流花湖雀仔

白话广州

有闹市“小鸟天堂”之称嘅流花公园，最近又发现咗新嘅鸟类“黑天鹅”。喺游客照片中，佢安静咁浮喺水上，喺绿草映衬之下尤为抢眼。

流花湖发现新雀仔，对于游客来讲系一个惊喜。但对于公园来讲，其实唔算少有。2018年，呢度就出现咗一只“大红毛鸡”，黑身红翼，叫声低沉，听起来好似狗吠咁——正系大名鼎鼎嘅褐翅鸦鹃，国家二级保护动物。因为罕见，所以当时亦引起咗好多关注。

小小一个闹市公园，点解会出现咁多罕见嘅雀仔呢？讲起呢个话题，好多人会第一时间惗起湖中嘅鹭岛，唔大唔细一处绿树掩映嘅所在，起码聚集咗58种雀鸟。每逢早晨黄昏，空中百鸟起舞，有灰鹭、白鹭、红耳鹎、白头鹎……景致相当养眼。

鹭岛留得到雀仔长住，好大部分得益于生态环境嘅改善。佢哋嘅绿化景观层次分明，既有落羽杉林区、蒲林广场、红桥葵堤呢啲高大树木区，亦有观荷塘呢类水生植物，更有紫薇、玫瑰等主题花景，共同形成一片树高草绿、花红水碧嘅美景。啲雀仔住得舒服，就逐渐由候鸟变成咗留鸟啦。

呢片景致宜人嘅“小鸟天堂”就坐落喺老城区嘅西边，大家有兴趣，就不妨去行下啦。

◎梁倩薇 编辑

新闻推荐

广州7万名公交车出租车司机已接种新冠疫苗 “乘客放心了，我们开车也更加安心了”

信息时报讯（记者刘俊通讯员交通宣）自新冠疫苗接种工作启动以来，广州市交通运输、卫健部门按照“应接尽接”的原则，组织公交车...