与峰兄探讨粤语
白话广州
单位领导峰兄系一位新广州人，平时好中意学粤语。呢，早几日佢又喺朋友圈晒出课程《粤语教学（5）》（以下简称《教学》），小弟趁机学习咗一下。
呢篇《教学》主要系讲解粤语中有关“水”嘅用法，不过，小弟对当中一啲内容有唔同睇法，想同峰兄探讨一下。
《教学》讲“吹水”亦叫“打牙较”。小弟认为，“较”系错别字，正确应系骹。
广州人讲嘅“牙骹”系指下颌骨关节，所以骹字部首从骨。
粤语有句歇后语：船头尺——庹水。《教学》系写成“踱水”。踱系慢步行走意思，部首从足；而庹系丈量意思，部首从尺。庹水原指算计银子，后引申为借钱。
广州街坊有时会将“边个”(谁啊)叫作“乜水”，《教学》都写到，但冇解释，事实上“乜水”系变音字，正写系“乜谁”，亦即系讲同水冇乜关系。
粤语有啲词组系吸收咗普通话嘅，比如“弊家伙”就系源自普通话“好家伙”(反义词)，“乜谁”同样系咁。
虽然，宜家粤语文字喺坊间使用都系比较随意，有好多系借字、同音字、近音字，甚至造字。但如果上升到作“教学”呢个层次嘛，咁内容应该更标准、更规范。◎阿六 律师
新闻推荐
桃花源记图（局部）（清）李含渼陶渊明诗意图（局部）（清）黄璧岁朝图（清）永瑢岁朝清供图（清）居廉请扫码至“羊城派·Vlog看展记”观看展览视...