自带“六小件”

白 话广州

以后住酒店，唔该自己带埋头梳牙刷！上周嘅新闻讲，听年起，广州中心六区嘅宾馆酒店都唔再喺房间度摆放“六小件”，包括牙刷、梳、须刨、鞋擦、浴擦、指甲锉，目的系减少塑料污染。

确实，我哋平时住酒店都见到呢啲一次性用品。好多人离开酒店都会扔掉呢啲用品；有啲旅客可能仲会一日一换，用完就成咗垃圾。久而久之，唔单只制造咗大堆嘅塑料垃圾，仲会相当浪费。其实，呢啲嘢都好湿碎细件，我哋如果出去旅游，自己喺屋企带上，亦唔会占好多地方，而且仲卫生企理，一举两得。

话时话，万一大头虾，唔记得带点办？我谂，估计酒店亦会个别提供俾住客嘅。不过，用完之后千祈唔好就咁掉咗，有啲嘢攞返屋企可以继续用，咁样亦对环保有利。好似须刨咁，其实仲可以循环再用多一排。

环保嘅举措，每人都要支持。不过，如果企喺消费者嘅角度谂，既然酒店唔摆放“六小件”，应该亦会悭返部分成本，能否将呢部分钱回馈俾消费者？譬如，房费适当优惠啲，又或者对于完全唔使用“六小件”嘅环保住客，给予一件纪念品等，咁样估计住客配合得会更加积极。◎闻歌 媒体人

新闻推荐

广州试点电梯按需维保在全市范围内试行，平均困人救援到场时间不超过12分钟

羊城晚报讯记者徐振天报道：日前，广州市市场监管局印发《广州市电梯按需维保试点工作实施方案(试行)》（下称试行方案...