新智能报刊亭

白话广州

前两日喺街上边，发现咗一个“新嘢”。一眼望落去，好似一个快递柜，又好似一个自动售卖机。再望真啲，原来系一间报刊亭。

呢间好似屋仔噉嘅报刊亭，大约四米几长，同传统嘅报刊亭差唔多大细。再仔细睇下，佢上边其实系分几个区域嘅。最左边系一个自动售卖机。再过啲，系一啲透明嘅格仔，大概有40格咁多，每一格有两三本书咁厚，睇落就系放书同报纸嘅。中间有一个大嘅透明玻璃窗，下边写住“捐赠书入口”。最右边，上边系两排共享充电宝，下边就有两个大柜，写住“行李寄存”。成个柜嘅功能就有呢啲，佢标示住话系统调试紧，暂停使用，入边仲未有任何嘢。不过从佢呢几个功能区嚟睇，呢个无人值守嘅智能报刊亭，基本就具备咗买饮料、买报纸杂志、借电、寄存呢啲功能。

查返资料发现，广州其实喺几年前已经开始试水无人智能化报刊亭，之前喺公园前地铁站附近就有类似嘅智能报刊亭，啲功能都差唔多，不过就唔系卖报卖杂志，而系借书。从而家嘅改变嚟睇，呢啲智能报刊亭都会根据市民嘅需求嚟调整，好似充电宝呢个功能噉，就够晒实用啦。◎阮栩 编辑

新闻推荐

吊臂车挂钩脱落撞向货运列车 2人受伤 事发芳村大道西芳信街，事故原因正在调查中

信息时报讯（记者陈子垤通讯员消宣）记者从广州消防部门获悉，11月17日凌晨02时28分，一列载货火车以时速30公里在芳村大道西芳信...