广州嘅蚝壳墙

白话广州

新闻讲，被广州街坊列作广州“网红墙”嘅七座建筑，“双节”期间成咗市民嘅打卡热点。

细睇呢啲“网红墙”，好几个都系有一定历史嘅“老墙”，当中最“老”嘅当数沙湾蚝壳墙喇。

蚝壳墙，顾名思义，就系用蚝壳做建材砌房屋嘅墙，属于古代岭南特色建筑嘅一种，佢嘅特点系造价低、够坚固、冬暖夏凉并且可防贼、防打仗，好适合当时嘅民生需求，呢种墙喺珠三角一带至少有800年历史。

广州嘅蚝壳墙主要分布喺番禺、海珠靠水、产蚝嘅地方，因为蚝壳墙属于就地取材起嘅建筑。

番禺沙湾古镇嘅蚝壳墙屋大多建于南宋，系广州蚝壳墙保留最多、最完整嘅地方，所以呢次“入选”网红墙系实至名归。

同属番禺嘅大岭村，嗰度有间叫做两塘公祠嘅祠堂，佢有埲蚝壳墙好巴闭，有成60厘米厚、9米高，有人计算过呢埲墙至少用咗10万个蚝壳，系广州单体面积最大嘅蚝壳墙。

除咗番禺外，海珠区小洲村古时亦系有上百间蚝壳墙屋，不过，随住时代变迁，宜家拆得只剩番四五间。

蚝壳墙体现咗我哋祖先嘅智慧结晶，得闲系要去打下卡，讲唔定可以提升智商呢。

◎阿六 律师

新闻推荐

广州市政协委员建议中考志愿填报改至考试后，市教育局回应：只改填志愿时间影响学校均衡

羊城晚报记者蒋隽广州市中考填报志愿的时间为中考前，市政协委员提案建议能否改成中考后填报志愿？日前，广州...