番禺与莲花
白 话广州
早嗰排，广州恒大足球队喺番禺嘅新主场最终设计方案公布，取名“莲冠”。好多人都留意到，新方案同较早前嘅旧方案对比，虽然有好多地方唔同，但核心内容都系一样——莲花。
恒大球场设计点解要紧扣莲花呢？事关番禺传统上就同莲花息息相关。
先讲讲番禺嗰座著名嘅莲花山吧。话说古代嗰时，嗰度原本系叫做石砺岗(亦叫石狮头)，出产砺石，系一个采石场。呢座石场经过好多年嘅开采，山上可以用嚟做石材嘅砺石都俾人开采到七七八八，剩番嗰啲石头虽然三尖八角，但形状奇特，睇上去好似莲花，所以当地人索性就将呢座山叫做莲花山。番禺从此同莲花结下不解之缘。
莲花山系因为石头似莲花而得名，咁番禺同真正嘅莲花又有几大关系呢？
番禺本身就系一个水乡，气候及地理环境非常适合水域浮游植物，所以好多地方都盛产莲花，区内嘅莲湖、莲溪、浮莲岗、莲塘村等地方，传统上都曾经广种莲花，东面嘅石楼镇更加有“莲花之乡”嘅称号，每年6—8月，当地仲会举办莲花节，成为当地一大盛事。
番禺同莲花有咁深嘅渊缘，所以，恒大喺当地设嘅球场当然唔少得有莲花元素啦。
◎阿六 律师
新闻推荐
《亮丽的风景线》（雕塑）吕学晶作推荐人黎明（中国美术家协会理事、雕塑艺术委员会主任，中国雕塑学会副会长）推荐词在勤思中精研...