“瘦田”变“肥田”
白话广州
周末喺海珠区一间酒楼同朋友饮茶，朋友两个细路都睇上咗一只鸡翅，开始打嘴仗。“头先摆喺度咁耐，都唔冇人食，家阵一个要另一个就来抢，真系瘦田冇人耕，耕开有人争”，佢哋嘅妈咪笑住话。“呢只系鸡翼，又唔系田”，小朋友同妈咪斗嘴。
细路妈咪讲嘅呢句广州话俗语好有道理。世上有啲嘢往往系咁，譬如某啲行业，开头阵时，只有一间公司开拓，等佢做到成熟阵时，就会冒出好多对手，一起分享呢个庞大嘅市场。呢个，其实系正常嘅现象，只要系遵纪守法。而且你争我赶，大家都会更重视产品同服务，咁自然会令消费者受益。
谂落去，“瘦田”之所以刚开始阵时冇人会耕，一来系眼光同勇气问题，好多人睇唔到佢嘅潜力、前景，或者唔肯付出努力，所以就俾人哋落后咗。只有精叻、勤恳嘅人，先会落力去耕，抢得先机。二来，“瘦田”耕开后，变肥咗，甚至变大咗，大家先会去争。从呢点去睇，敢为人先，唔单只可以自己攞到应得嘅丰厚收获，而且仲帮其他人开拓咗新领域，带来咗好经验。
所以话，鼓励创新开拓，就系鼓励大家多耕“瘦田”，将佢变成“肥田”。◎闻歌 媒体人
新闻推荐
记者从海幢街道政务服务中心了解到，近一周业务办理总量为315宗，其中业务量排民前三分别为人社业务、民政业务以及退管业务...