印象海珠桥
白话广州
呢排，海珠桥改造，唔少街坊趁住佢围蔽，上桥影相留念。新闻亦勾起咗我自己对于海珠桥嘅点滴记忆。
上世纪九十年代末，我返工嘅地方喺海珠广场隔离，上落班往返于越秀同河南之间，有时骑车，有时坐公共汽车，有时甚至行路过桥，再喺江南大道北坐车返屋企。最记得嗰阵时，早上唔少单车搭住菜等货物，由南往北，到越秀去卖。嗰时，条桥仲未重修，坡度大，有啲阿姨搭住菜，到咗半坡就停低，吃力咁推单车上桥。有啲晨运或返工嘅后生仔，就会主动上去，帮阿姨将单车推到坡顶。依家谂起，满满嘅暖意。
仲有一点印象深刻：嗰阵时珠江两岸嘅建筑好多大屏广告，其中有一个，就系某大牌嘅手机广告，喺江南大道北靠西嘅建筑上，每晚闪亮喺江边，吸引唔少游客。嗰阵正系手机开始普及，呢则广告卖嘅手机，竟有简单嘅上网功能，非常吸引眼球，行过嘅街坊都会往广告屏睇多几眼。加阵廿年过去，呢个手机牌子已经俾更多牌子替代，不过海珠桥边呢幅广告，我嘅印象仲好深刻。
呢两个小片段，都喺海珠桥边发生。呢座老大桥，唔单只见证咗广州嘅进步，仲见证咗呢座城市嘅人情味。
◎闻歌 媒体人
新闻推荐
街坊有所呼小e有所应扫码说出您的烦心事，小e助您解决有求必应街道消毒站工作人员在现场进行喷药消杀...