荒村？芳村！

信息时报 2019-04-30 00:58

白话广州

最近芳村花地立交要拆，有个住喺芳村嘅朋友听到呢个消息好高兴，因为佢日日都因为塞车而牙痛咁声。

依家嘅芳村唔系旧日嘅芳村，车多人多，同市中心一样喇。芳村同二沙差唔多，佢由沙土沉积而成，算系广州年代比较久远嘅一个“沙”。后来有人移居当地，呢度开始变成小渔村。由于呢个地方地势低而且荒凉，所以大家都叫佢做“荒村”。再后来，有人喺呢度大面积种植花木兼引进唔少花果品种，“荒村”就变成一个大花园，花香果香远播，“荒村”就变成“芳村”。

提到“芳村”，当然唔可以唔提“花地”。花地系岭南第一花乡，但“花地”呢个地名唔系因为佢系“种花之地”。其实“花地”以前叫“花埭”，“埭”即系堤坝嘅意思，“花埭”就系“花嘅堤坝”。以前嘅“花地”同“芳村”系同一个地方。

后来，“芳村”因为一间医院而更加出名，我谂大家都听过呢句玩笑——叫某人“返芳村”。呢间病院叫做“芳村惠爱医癫院”，系中国第一间精神病专科医院，专门收治精神病患，后来改名叫做“广州市精神病院”。“返芳村”并无恶意，有人听完都系一笑置之。不过，虽然呢句玩笑并无歧视意味，但系大家都系少用比较好。毕竟依家嘅芳村，已经相当宜居喇。

◎李月婷媒体人