百年前嘅运动会

白话广州

2月21日，广东仔苏炳添喺德国杜塞尔多夫再创佳绩，喺男子60米决赛中跑出6秒49，夺得冠军。呢次系添仔继爱尔兰、伯明翰之后第3次夺冠。咁把炮，真系抵俾佢一个大大嘅“赞”啦。

田径运动对于亚洲人来讲唔算系一个强项。个中原因，除咗身体条件之外，竞赛文化发展得比较迟亦系一个原因。大家所熟悉嘅古代奥林匹克运动会，两千年前就喺希腊举办了。而我国第一次全国运动会就要到1906年先开始举办，地点就喺广州东较场。

当年时局唔好，所以运动会条件十分简陋，时值冬天，主办方亦唔懂得选个夏秋时节，方便运动员发挥潜能。场地自然唔系塑胶跑道了，荒地上用石灰画个圈，咁就算系跑道了。选手亦缺乏科学装备，长衫长裤，着布鞋嘅有，打大赤脚嘅亦都有。

讲到奖品，如今就梗有奖状、奖牌同奖金呢几样。但当年，就算系第一名，奖品亦以名誉为主——就系“双龙戏珠”得胜旗一面，由岭南学堂获得，返去挂喺墙度就可以威足一年了。

但就算系咁，呢一届运动会依然被大家一直记住。因为佢开风气之先，以尚武精神，呼唤国人自立自强，从沉睡中醒来，踏上百年振兴之路。从当年，到今日苏炳添，中国田径运动嘅历史，亦系华夏民族从积弱走向复兴嘅缩影。

◎梁倩薇 编辑

新闻推荐

家居销售小高峰 电商迎来“开门红”

□信息时报记者王颖婷农历新年结束，广州各大家居卖场陆续启市。记者走访多家家居卖场发现，春节期间销售“遇冷”，但在淘宝、...