“南北”桃花

白话广州

桃花，历来都系广府人嘅心头好，除咗寓意“花开富贵”、“大展宏图”之外，啲靓仔靓女最中意嘅就系行桃花运。买樖桃花过年，系广府人过年嘅传统习俗之一。

广州嘅桃花，有“北有石马，南有海北”嘅讲法，分别指嘅系白云均禾镇嘅石马村同埋荔湾嘅海北村。呢两度嘅桃花都有百年以上嘅种植历史，尤其系海北村，据讲每年嘅腊月二十，就会有市民嚟呢度啲桃花田选购桃花，到咗年廿五前后，就会人山人海。海北嘅桃花有三个特点，一系花期长，可以从年廿几开到正月十五；二系花形大，都系双托嚟嘅，有三到四层嘅花瓣；三系花色鲜艳，花瓣比一般嘅要鲜红好多。

而石马桃花就好有文化历史。系1983年开始，呢度就已经有桃花雅集嘅活动啦。雅集，即系文人雅士吟诗作对、泼墨作画嘅聚会。嗰时，系桃花树下，好多岭南出名嘅大家都会聚集埋一起，比如秦咢生、陈残云、秦牧、关山月、黎雄才都有参加过。呢个雅集活动曾经一度中断过，旧年又重新开始，再续“桃花缘”。

而家去石马村，除咗睇桃花、买桃花之外，仲可以睇到当年雅集盛况嘅旧照片。而且，仲可以睇到村民做桃花酥、编织桃花箩嘅传统手工艺，到时，食住酥饼赏桃花，真系新年一乐也。◎阮栩 编辑

新闻推荐

荔湾区委十二届七次会议昨召开 推动国家中心城市核心功能区建设上新水平

24日上午，中共广州市荔湾区第十二届委员会第七次全体会议召开。吴伟洪王誉臻摄24日上午，中共广州市荔湾区第十二届委员会第...