“天体”嘅记忆
白话广州
新闻话，天河体育中心刚搞掂咗一次升级改造，其中最大嘅变化，就系坐椅主题，从高望落成咗一朵盛开嘅木棉花。“天体”建好32年，大个仔亦系时候要执靓仔啲。
喺广州人嘅记忆中，“天体”系呢座城市嘅地标之一。仲记得1987年，广州举行六运会，佢系一次举国瞩目嘅体育盛事，而“天体”就系开幕式及赛事主场地，成咗中国嘅焦点。我当时读紧小学，学校组织大家睇六运会嘅开幕式。嗰阵时电视机刚喺普通家庭出现，成间小学就睇一部电视，而且系黑白嘅。不过，大家都睇得格外兴奋入迷，“天体”亦成咗唔少人神往之地。我读初中阵时，学校就组织到“天体”参观。虽然细节大部分已经忘记，但当年喺天体映嘅相仲保留住。
我住得离“天体”远，好少到呢度运动，不过好耐之前，身边唔少朋友都习惯到呢度打球，游水。对我来讲，“天体”更多系一个行街、展览嘅打卡点。喺天河商圈呢个“圈”里面，“天体”系最早嘅“圆心”。佢南边嘅天河城，西边嘅购书中心，北边嘅中信，都属于后辈。喺我嘅印象中，“天体”唔单只系体育场所，呢度仲搞过唔少墟撼嘅展览，比如大型嘅书展、美食展等。呢几年，广州展览场地、商业中心多咗，先逐渐令“天体”回归到体育运动本身。◎闻歌 媒体人
新闻推荐
陈真真《花相鸢尾之二》广州日报讯（全媒体记者李巧蓉摄影报道）从近日起至2月25日，“罗曼蒂克2次方”陈真真、禤慕贤油画...