龙床不如狗窦
白话广州
“几高级嘅酒店，都唔够屋企住得舒服，龙床不如狗窦啊！”喺朋友圈度，讲起最近关于某啲酒店卫生唔达标嘅问题，有个朋友就讲笑话。呢句话，旧时好多广州老坊经常挂喺口上。
记得细个阵时，屋企嘅大人经常讲起，离开屋企出外办事，总会遇到各种难题，所谓“在家千日好，出路半时难”，其中最唔方便嘅一点，就系住宿。瞓喺一张陌生嘅床上，点都冇自己屋企嘅咁舒服，甚至会瞓唔着觉。呢样嘢，一方面因为旧阵时经济条件有限，旅业达唔到舒适嘅需求；另一方面，以前大多数人长期习惯咗一成不变嘅生活模式，一旦出外，呢种稳定嘅状态打破，从心理来讲要适应，亦唔容易。
不过，时代在变。加阵嘅后生仔女，对新鲜事物更加愿意尝试、接受。而且，酒店嘅舒适度大为提升，所以，住酒店已经唔再有“不如狗窦”嘅烦恼。有啲小朋友甚至一到假期，就盼望父母带佢哋出外度假，去游学、夏令营等等。
不过，“龙床不如狗窦”，也许并唔止讲自己张床。喺屋企，旁边有父母、仔女，仲有自己熟悉嘅朋友，呢种安全感，确非一张五星级嘅大床可以替代。硬件可以升级迭代，但感情却系“人不如旧”。从呢点睇，龙床确实比唔上嗰个陈旧但温情脉脉嘅“狗窦”。◎闻歌 媒体人
新闻推荐
亚冠·焦点 广州恒大小组赛 又一对手呼之欲出 广岛三箭夺J联赛亚军，只需通过附加赛就将进入F组
2018赛季日本J联赛昨天结束了最后一轮的争夺。广岛三箭在客场与札幌冈萨多战成2比2平，获得J联赛亚军，如无意外，他们将在下赛...