有趣嘅食物代词（下）
白话广州
广州人中意煲汤，其中有一种汤叫粉葛鲮鱼赤小豆，味道好正嘎。咁点样先可以煲到呢种靓汤呢？嗱，最关键就系要拣到碌靓葛！真系天生我材必有用，粉葛长相虽然木口木面，但胜在有“内涵”，使自己成为一流嘅煲汤料，都算争气。不过，闹人嘅人系唔理你有冇“内涵”嘅，所以粉葛仲系因个“蠢样”而被借用作代词。
“一碌葛咁”、“成碌葛咁”，呢啲声音唔系嚟自街市嘅买卖声，而系闹人、贬人嘅常用词。只要对方表现蠢钝，或做事犯低级错误，都可以成为“煲汤料”。
粉葛因为“外因”而“入选”代词，而另一种食物却系因“内因”而“埋堆”，讲嘅系水鱼。
凡系俾人轻易侵占利益嘅人，通俗叫做“俾人揾笨”，大家会嘲笑为“俾人当水鱼揿”。咁点解系水鱼呢？因为水鱼嘅壳系软嘅，捉上嚟用手一揿，佢身体里面就会出水，大佬，“水”为财呢。
粤语用食物做代词闹人、贬人真系五花百门：嘲笑大龄未婚嫁嘅男女就叫“卖剩蔗”、“箩底橙”；闹人唔用脑嘅叫“食塞米”；闹人去食屎嘅就叫“吔蕉”……
闹人或俾人闹每个人都在所难免，但用词方面，用一句“粉肠叉烧一碌葛”总比“人体器官加父母”好听得多。咁样唔知算唔算广州街坊语言文化嘅一种文明进步呢？◎阿六 律师
新闻推荐
帝亚吉欧中国区高级品牌大使沈玉林“原桶臻选”2018年度力作波特艾伦40年最老单桶耀世亮相文/林清清图/品牌提供帝亚吉欧...