李白巷与白沙巷
白话广州
小弟成日听到有人（包括老广州人）问：北京路嗰条李白巷系咪同唐代大诗人李白有关？回答呢个问题前，我要先讲讲旧时。
话说喺N年前，小弟仲系十六七岁卜卜脆嗰时，喺北京路附近一间中学读书，有个同学就住喺李白巷。某日，上课学古文讲到李白，小弟就羡慕妒忌恨咁同呢位同学讲：你就好啦，住喺大诗人嗰条巷。点知呢条友答：你搞错咗喇，李白巷同李诗人无关，同李旅长有关。
的确系咁。又话说，喺清末民初，北京路呢条巷仔有一间大祠堂，住咗一个姓李嘅大军阀，据讲系位旅长。当时，台山、开平一带嘅李姓族人进京赶考，都系到李家祠堂落脚暂住。正所谓同姓三分亲，呢位李旅长就热心收留呢啲人。久之，呢条巷住嘅人十有八九都系姓李嘅，咁大家索性将呢度叫做李家巷，但后来发现广州叫李家巷有好几条，所以为咗区别就改成李白巷。
喺广州，可能因为避忌，街巷好少有个“白”字嘅（“白云”除外），有嘅多数同人有关，比较出名嘅除咗李白巷，仲有人民中路嘅白沙巷。又话说，明朝期间，著名嘅哲学家、教育家陈白沙有次嚟广州讲学，喺丰宁路(宜家嘅人民中路)一条巷仔住过，后人为咗纪念呢位新会“白沙先生”就将条巷叫做白沙巷。
记住啦，李白巷同李白无关，白沙巷同陈白沙有关。
◎阿六 律师
新闻推荐
活动恰逢周末，许多家长带小朋友前来参加活动，并现场作画。江门日报讯（文/图记者/陈方欢通讯员/王炳新）4月21日，台山市在新宁体...