旧时天文重镇

白话广州

7月4日，系今年广州日落最迟嘅一日。要等到19点16分51秒，太阳先至跌落地平线，比起日落最早嘅11月28日，早咗1个钟36分29秒。呢种有趣嘅天象，一定会吸引好多天文爱好者观测记录啦。

讲到天文事业，广州都有一段威水史：佢曾经系中国近代天文科学嘅重镇，拥有中国人喺本土自主建成嘅第一座现代化天文台：中大天文台。呢座科技建筑，由祖籍广东开平嘅天文学博士张云兴建，1929年竣工。5年之后，大名鼎鼎嘅紫金山天文台先至成立。

中大天文台，如今你仲可以喺越秀中路旧址上面见到佢。呢座天文台虽然细，但亦曾经驰名世界。佢有一个好明显嘅优势，就系当年世界好多著名天文台都位于北纬40度以上，而中大天文台纬度要低得多，会为观测带来唔同嘅视觉。所以，佢嘅观测结果颇受重视。后尾，张云教授发现新变星，轰动学术界，哈佛大学仲特别将远东最大嘅天文望远镜送咗俾中大。

天文学术研究，曾经喺广州有一个好辉煌嘅开头。后来院校大调整，中大天文系连人带设备全部并入南京大学，中大天文台就由一个学术标杆，变成咗一个科学遗址。直到近年，中大先成立天文与空间科学研究院。

前前后后，计起上来都已经过咗八十几年咯。真系人事几番新啊！

◎梁倩薇 媒体人

新闻推荐

江湛铁路通车，助力旅游加快发展 开平着力打造华侨文化旅游新高地

开平南站广场上正展出碉楼摄影作品。江湛铁路带来大量人流，开平世遗将迎来发展新机遇。2007年6月28日，开平碉楼与村落成功...