蔬果“捞过界”
白 话广州
天时暑热，瓜类成咗餐台主角。丝瓜、冬瓜、苦瓜、节瓜，无论煲汤定清炒，解暑又好味，特别抢手。新闻话，广州仲开发咗唔少新鲜嘅瓜类品种，其中就有一种可以生食嘅苹果丝瓜，听落去又几吸引。
睇张相，呢种苹果丝瓜唔似丝瓜咁瘦，佢生得肥肥白白。据讲，佢食落有苹果嘅香味，口感比丝瓜嫩滑，而且产量亦好高。睇到呢啲新鲜又好味嘅蔬果品种，真该为广州嘅农科人员点赞。
话时话，呢类又可以当菜炒，又可以做水果生食嘅蔬菜，家阵街市仲有唔少，譬如番茄仔、红萝卜、黄瓜、西生菜等等。相比水果，呢类“捞过界”嘅蔬菜可能冇咁甜，但佢嘅口感好特别，比水果更爽脆。
喺广州，仲有两种本地产嘅“跨界”蔬果，一直系街坊经常食嘅。一种系马蹄，喺南沙、番禺等水田都有种，佢可做食材，譬如整成马蹄糕、云吞或饺子等点心，口感爽脆甘甜，仲清热去火添。另一种就系土瓜，又叫蕃葛，佢可以煲汤或者炒瘦肉，生食亦得，清甜多汁，口感特别。
家阵炎炎夏日，呢啲跨界嘅蔬果，最啱做餐前凉菜，一来可以开胃，二来增加我哋餐台上嘅蔬菜比例，对健康亦大有帮助。◎闻歌 媒体人
新闻推荐