客运站嘅记忆
白话广州
呢排，唔少番禺街坊都注意到一条新闻，就系市桥客运站下月要跟街坊拜拜。
讲起亦唔奇怪，事关如今交通出行多咗好多便捷嘅方式，有高铁、城轨，加上唔少人都有车代步，坐长途班车嘅需求已经唔似旧时。所以呢几年，唔少地方都有汽车客运站结束咗自己嘅历史使命，其中包括越秀南、永泰、黄埔客运站等等。
不过，对街坊来讲，呢啲客运站都满载咗旧时出行嘅种种记忆。就好似市桥客运站咁，佢诞生喺1986年。嗰阵时，唔少省内或者省外嘅人来呢度做生意、打工或者探亲，都系坐长途班车。客运站就好似如今嘅广州南站咁墟撼，男女老少，孭住背囊，拎住大包细包，手里攞住车飞，排队上车，个个嘅面上都充满住出行嘅新鲜或者激动。
我来广州做嘢已经二十几年，最初嘅时候，返屋企都系坐长途大巴。嗰时要到现场买票，等车，走一转至少要提前半个钟到汽车站，费时费力，不过带住期待，亦唔觉得辛苦。对唔少人来讲，车站记录咗出行嘅酸甜苦辣。
我谂，呢类长途客运站最终都会退出街坊嘅视野。不过，政府可以考虑建一个长途大巴博物馆，展示返呢啲往事与变化，亦展现时代嘅进步。◎闻歌 媒体人
新闻推荐
安徽省六安市的“六”究竟读“lù”还是读“liù”？近日，关于六安的正确读音，引发社会热议。对“六”音之易误读，笔...