仁面味芒果

白 话广州

夏日炎炎，路边啲花花草草都晒到头耷耷。但系有种花，越热就开得越灿烂，而且冇几耐仲会结出啲令人“又爱又恨”嘅水果，佢就系芒果喇。

最近白云区夏茅村有件同芒果有关嘅喜事。村里边嗰棵二百几岁、多年冇结过果嘅香芒古树，竟然结咗好多芒果。查咗下，呢棵树已经好几十年冇结过果喇。

依家啲后生可能唔识宝，平时食芒果唔系进口嘅就系从海南运过嚟嘅，唔知道夏茅香芒曾经都系全国闻名嘅。食过夏茅香芒嘅人都话佢“正”——呢种芒果有三种味道，一种系桂花味，一种系白兰香味，仲有一种系仁面味。桂花味同白兰香味早就冇咗喇，听食过桂花味芒果嘅老人家话，呢种芒果最香，未剥皮就可以闻到浓浓嘅桂花香。因为够特别，喺上世纪50年代呢只味道嘅芒果仲作为广州特产俾人带上北京。

今次结果嘅，系夏茅村仅存嘅香芒古树，呢棵树出产嘅芒果系仁面味嘅。仁面又叫银稔，系一种南方水果。其实写呢段文字嘅时候，我除咗不停咁吞口水之外，仲喺度不停咁谂：仁面系水果，芒果又系水果，两只味嘅水果集于芒果一身到底有啲乜嘢惊喜呢？希望以后会有机会试下呢只“广州特产”啦。

◎李月婷 媒体人

新闻推荐

或因长期熬夜 女子动脉瘤破裂险丧命

信息时报讯（记者刘俊通讯员郑琳）不少人喜欢通过熬夜看剧、玩游戏、刷朋友圈等来实施“报复性熬夜”。殊不知，熬夜不仅伤身，还...