生滚粥之“滚”
白 话广州
今日仲系写同信息时报《广州原味道》有关嘅内容。
上周六“原味道”系讲生滚粥。小弟唔系美食家，冇资格点评呢种小食嘅味道，但对当中嘅粤语用字仲系有啲心得。
生滚粥系广州街坊嘅粤语叫法，呢个名最显“广味”嘅当数嗰个滚字。
滚，有滚动同沸腾两个意思，普通话多数表示前者，而粤语就多数系讲后者，比如开水叫做滚水。
生滚粥烹饪特点之一就系快，即用沸腾嘅粥底将食材短时间渌熟，称之为“滚”。大家都知道，老火汤不宜多饮，但另一种汤就可以，讲嘅系滚汤，因为佢嘅特点同生滚粥相似，烹饪时间短，更利健康。
上述两个“滚”，系滚水形态喺食物中嘅一种延伸，同时亦系粤菜追求新鲜、原味嘅一种体现。
滚喺粤语中主要用喺饮食方面，但亦有“他用”：比如讲有唔见得光嘅事叫“有景滚”；指男人去拈花惹草嘅就叫“去滚”。不过，“景滚”其实只系同音借字，本字系輘輷，古汉语，原先系指车辘发出巨响，后反义解释为有不可告人内情嘅意思，而讲衰男人嗰个“滚”，系輘輷嘅引申字。
所以，“滚”嘅本质就好似滚水咁清白。
◎阿六 律师
新闻推荐
羊城晚报讯记者周聪报道：5月14日，广州市人民政府新闻办公召开新闻发布会。广州市人社局副局长李明华、广州市医保局副...