羊城“飘雪”

白话广州

呢段时间，广州啲街头时常有“雪”飘落嚟。特别系老城区，喺一啲空阔嘅小区度，时不时都可以见到白色嘅“雪”轻飘飘噉落嚟，啲细路见到特别兴奋，不停咁追住跑，仲伸出手仔去想捉住呢啲“雪”。有心嘅街坊可能仲会发现，一啲空阔嘅草地度都好似淡淡噉铺上一层“薄雪”，好似中山纪念堂、广州大桥二沙岛环桥下边嘅草地。

睇到呢啲，各位都好奇怪：广州真系落咗雪咩？咁梗唔系啦，呢啲白色嘅“雪”其实系棉絮，佢系异木棉嘅果实。各位可能会忽略一样嘢，广州除咗遍地木棉树，仲有佢嘅“表弟”异木棉。因为木棉树嘅果实都会结出棉絮，最开始，我都以为呢啲棉絮喺由木棉树嚟嘅。后嚟睇报道先知，异木棉先至系广州呢场“雪”嘅制造者。

呢啲“雪”点解今年特别明显呢？据专家讲，异木棉嘅花期一般系每年嘅九月到第二年嘅一月，冬季时开花最旺盛。因为今年入夏入得早，从4月初开始，异木棉嘅果实开始成熟爆开，入边啲棉絮就随风飞舞，形成咗而家咁特别嘅“羊城飘雪”一景。不过，专家仲提醒，呢啲“雪”虽然好靓，但容易引起过敏，皮肤、呼吸道容易过敏嘅人就千祈咪过多去碰佢啦。

◎阮栩 编辑

新闻推荐

广州来穗人员积分制入户启动 今年增加1200个指标，入户申请提前至8月开始

信息时报讯（记者马泽望通讯员来穗宣）记者昨日从广州市来穗局获悉，2021年度广州市积分制入户工作已启动。今年常规积分制入户...