眼见才算干净
白 话广州
广州话讲，“眼唔见为干净”。尤其系出外食饭，厨房里边到底点洗菜、整菜，够唔够干净企理，你根本睇唔到。睇唔到，就只好当佢系干净嘅。
不过，呢点有望得到改善。新闻话，广州专门针对外卖嘅食品安全，正做紧专项整治，其中对于外卖餐厅时兴嘅“共享厨房”，准备推行“互联网+明厨亮灶”模式，要求外卖平台要实时展示食品加工制作过程。咁就等于话，呢类外卖饮食店，要设置啲摄像头，好似直播咁，俾客户睇到厨房。
呢点确实好有必要，事关外卖跟堂食唔同：堂食仲可以从餐厅现场睇到部分卫生嘅细节，外卖嘅卫生就难睇到。“直播”洗菜、炒菜、装菜，唔单只俾客人睇到，仲要求外卖平台日常加以监督，合格嘅先可以卖，有问题嘅就要下线，咁样先可以令顾客食得放心。而且，呢点亦利于维护外卖平台嘅声誉。如果唔系，边个仲敢食外卖呢？
眼唔见为干净，呢句话喺讲笑之余，多多少少蕴含咗食客嘅无奈。旧时技术唔够发达，有时确实冇办法监控厨房卫生做够精细。今时今日，有高清摄像头，有秒传嘅网速，有更多嘅技术手段，“眼见为净”应该可以做得到。
◎闻歌 媒体人
新闻推荐
珠江瞭望《广州日报》记者从广州知识产权法院近日召开的新闻发布会上获悉，“红日E家”因为“傍名牌”，遭到“红日”商标所...