游览大钟楼⑤
白话广州
喺上一篇文章，我介绍咗粤海关博物馆入边好多人性化嘅设施，今期讲下入边高科技啲嘢。
建于一百几年前嘅大钟楼，唔单用料讲究，好多都系来路货，其中有一样嘢好先进，就系大楼正中间嘅电梯。当时，大钟楼就系广州最早使用垂直电梯嘅建筑之一。呢部电梯可以从一楼直达四楼。呢度而家仲保留住一份当年呢部电梯曳引轴唔同方面嘅数据。不过呢部电梯喺上个世纪50年代就已经拆除咗，而家保留系度嘅只有顶部个滑轮，同埋每层嘅铁架电梯门框。而家嘅新电梯系2015年装嘅，因为受到以前电梯厢井嘅局限，而家电梯只系上到三楼。
系大钟楼啲展品入边，有唔少系当时嘅办公用品，呢啲都有“黑科技”，其中一个系手摇计算机。呢部系中国第一台嘅统计机器，系1931年5月引进嘅，呢部计算机主要用嚟编制贸易统计。除咗呢个，仲有一个简单嘅办公摆件都好引人注目，佢就系一个由英国进口嘅印章架，佢上边可以挂10个印章，当时摆喺报关大厅用嚟办理报关业务嘅。呢个印章架最科学嘅地方，就系佢可以旋转嘅，就算10个印章咁多，只要一拨一转，就可以轻松搵到所需要嘅业务印章。
◎阮栩 编辑
新闻推荐
广州日报讯（全媒体记者曾卫康）昨日下午，广州市侨联召开十三届六次全委会议。广东省侨联党组书记、主席黎静，广州市委常委...