“瞓”嘅读音
白 话广州
上周日系世界睡眠日，咁啱，早嗰排一位做视频嘅朋友张小姐向小弟提咗一个问题：广州人讲瞓觉嘅“瞓”字点解有两种读音？边个为准？
今日小弟就讲讲呢个同睡眠有关嘅“瞓”字。
粤语瞓字系睡、躺嘅意思，大多数广州人系读fan3(音同训)，但亦有少数人系读han3(音近恨)，前者系东山音，后者系西关音。
虽然好多地方都讲粤语，但唔同地方有唔同嘅读音，比如广州人讲嘅系广州音，系粤语嘅标准音，而广州音仲可细分成西关音、东山音、西村音、番禺音，其中又以西关音为标准音，但因东山以前权贵聚居，对粤语发展影响好大，所以宜家广州人讲嘅粤语大多数系东山音。
西关音懒音较重，并且有n、l唔分嘅发音等特点，好多词组读音自成一派，同东山音有明显区别。不过，随住时代变迁，宜家讲标准西关音嘅人已经系少数(以长者居多)，就算西关当地人讲嘅粤语大多数已融入成东山音，好难分出“东”或“西”，只系个别词组仲有区别，瞓觉嘅“瞓”就系其中一个，类似仲有：“依个”(西关音)，“呢个”(东山音)；“依家”(西关音)，“宜家”(东山音)。
个人认为，“瞓”应以fan3为准。◎阿六 律师
新闻推荐
羊城晚报讯记者付怡报道：3月22日晚，广州番禺警方通报：3月22日10时许，广州市番禺区化龙镇明经村发生一起刑事案件。番禺警...