游览大钟楼①
白 话广州
话广州系“博物馆之城”一啲都冇花假。呢度有好多大大小小嘅博物馆，仲有唔少行业博物馆，好似粤海关博物馆噉。呢个建筑本身就系一部百年中国海关史。
从1916年竣工到而家，呢座海关建筑喺沿江西路已经屹立咗105年。2016年之前，呢度仲系广州海关嘅办公场所，改咗做博物馆之后，市民就可以入去慢慢参观感受。
粤海关博物馆又叫“大钟楼”。佢最顶顶嘅塔楼，有一只大圆钟，喺钟表仲未普及嘅年代，附近嘅市民都系听住呢个钟嘅钟声掌握时间嘅。行入到博物馆，你就好似忽然间时光倒流噉。一楼右边嘅报关大厅仲摆住啲蜡人，还原咗当时报关嘅场景。呢度所有嘢都原汁原味噉保留咗落嚟，从英国伦敦引进嘅铸铁壁炉、老式嘅花阶砖地面、已经氧化成冬瓜青咁色嘅墙壁护砖，呢啲建筑好有特色仲好有智慧。好似壁炉噉，呢个几乎唔会出现喺南方嘅用品，竟然喺度出现。原来，岭南天气潮湿，特别系回南天，壁炉就系为咗除湿用嘅。海关办公最多嘅就系纸质单据，冇空调同抽湿机嘅年代，最好嘅防潮方法就系用火炕，壁炉就系最好嘅选择。据讲，呢啲壁炉而家仲可以用，偶尔仲会点下火嚟防潮。◎阮栩 编辑
新闻推荐
南方医科大学南方医院呼吸与危重症医学科主任蔡绍曦南方医科大学南方医院风湿病诊疗中心主任李娟广州医科大学附属第一医...