“坚嘢”与“流嘢”

白 话广州

听日系3·15消费维权日，广州街坊如果讲到商品质量问题，有两个词组相信会讲得特别多：“坚嘢”同“流嘢”。

粤语坚嘢系指商品系正品或质量好；流嘢系指商品系冒牌或质量差。

点解广州人将好嘢、冒牌嘢分别称为坚嘢、流嘢嘅呢？

《康熙字典》中，“坚”系指：实也，固也，劲也。现代汉语“坚”字本意指坚硬。两种字义用喺商品上，可解释为质量过硬，为之坚嘢。

不过，小弟认为“坚嘢”亦可能同英语有关。

英语“正品”系“quality goods”，其中尾音好似粤语“坚”字。广州人所讲嘅“坚嘢”，最早系从香港传入，所以佢可能同“打的”“打波”一样，系吸收咗英语嘅外来词。

至于“流嘢”嘅来源就有咁嘅传说——

话说喺西汉末年，皇室嘅绿林军同另一支军阀赤眉军打仗，但皇室军队唔够人家打，于是临时请咗一个叫刘盘子嘅放牛农民替皇室出战，结果打赢咗。但因为刘盘子唔系皇室嘅人，属于冒名顶替嘅，所以坊间就将佢叫做“刘野”，后嚟传下、传下就变成“流嘢”，并且特指假冒行为，流传至今。

无论上述坚嘢、流嘢嘅来源系“坚”定“流”，大家买嘢一定要坚嘢唔要流嘢。◎阿六 律师

新闻推荐

广东新增20家高水平医院重点建设医院，每家获3亿资金支持 广州高水平医院增至17家

20家高水平医院重点建设医院名单信息时报讯（记者张漫通讯员粤卫信）近日，广东省第二期20家高水平医院重点建设医院名单出...