团圆饭 食盆菜
白话广州
年卅晚嗰餐团圆饭系好多家庭主妇嘅“心头大事”，即便系多数人都喺酒楼解决，要拣啱地方同时间，都唔系咁容易。今年据讲好多人都准备喺屋企开饭，点样准备先至最悭时间？当然系叫外卖啦，而且系卖相够好嘅盆菜。
盆菜唔系广州特产，但属于粤菜菜式，发源于深圳同香港交界处。关于盆菜嘅起源，据讲分“落难派”同“贵族派”。呢两种讲法嘅主角都系宋朝人，一个系文天祥，另一个系南宋末年嘅皇帝。不过无论主角点变，唯一冇变嘅系盆菜嘅形式——首先，系将所有好食嘅嘢都堆喺入面；其次，装食物嘅系一个木盆。
咁样睇，依家嘅盆菜都只系做到上面嘅第一点，而装菜嘅器物已经换成不锈钢盆或者大砂煲。虽然盆菜唔系发源于广州，但喺广州嘅城中村，佢仍然系村宴嘅重头戏。譬如白云区嘅岗贝村，逢正月十七都会搞年宵活动，其中嘅亮点就系盆菜——装食材嘅铁盒放喺台面上边，厨师将做好嘅鱿鱼、虾、鸡肉添入铁盒，最后由大厨喺铁盒里边加入松子鱼，另一人淋芡，一道盆菜就大功告成喇。
当然喇，盆菜究竟食乜，完全系丰俭由人，普通鸡鹅鸭可以，鲍参翅肚亦都可以，并冇具体规定。◎李月婷 媒体人
新闻推荐
培英中学体育老师邓登勋（后排左五）和他的排球班学生（学校供图）。培英中学体育老师邓登勋（后排左五）和他的排球班学生（学校供图）。...