防疫当前莫搭台

白 话广州

最近，广州有关部门发出防疫指引，要求食肆喺春节期间，唔俾客人堂食“搭台”。

广州人所讲嘅“搭台”，就系指引讲到嘅“非同行顾客同桌就餐”。亦即系讲唔识嘅人坐埋一张台食嘢。

搭台喺广州好多酒楼都有，尤其系早茶，一张10人大台，闲闲地都会坐咗七八位或三四组“非同行”嘅食客。

本来，搭台系无可厚非嘅，佢属于一种资源合理利用，同时亦可体现广府人包容、随和性格嘅一面，甚至被认为系本地饮食文化嘅一部分。不过，今时唔同往日喇，防疫当前，呢种挨咁埋嘅“文化”暂时放埋一边，食得安全先系最紧要。

事实上，从防疫角度讲，搭台的确存在传播风险。大家谂下，一个(或几个)三唔识七嘅人坐喺你隔篱，擘开个口喺度“烚”“烚”声食嘢，时不时仲口沫横飞咁喺度吹水，而你同你嘅食物冚唪唥都喺佢嘅“射程”之内，真系好崖烟嘎，万一对方系……，咁就仆街啰。

记住，为咗自己，为咗他人，冇俾人搭你台，你又冇搭人台，如果唔系，坐喺你隔篱嗰个人，随时都会将你变成“隔离人”，到时就番薯跌落风炉——该煨啰。

◎阿六 律师

新闻推荐

在广州拾金不昧可奖财物价值10%奖励金所需经费纳入实施奖励单位部门预算统筹安排

奖励金所需经费纳入实施奖励单位部门预算统筹安排