喺广州让座

白话广州

上个月嘅22日，系广州第十个“让座日”，“让座”亦成咗呢段时间嘅热门话题。一位外地来广州工作嘅朋友，讲起对广州嘅印象，佢话经常喺地铁或者公交上睇到让座，呢点俾佢留下好暖心嘅印象。

记得好多年前，我嘅细路女仲细，要抱住搭地铁，每次上地铁基本都有人让出座位俾佢，甚至一啲本身都带住细路嘅老爷爷、老婆婆，仲会谂法挤出啲位俾佢坐。个阵时，我都会跟个女话，你睇下人家让座俾你喔，等你大个啲亦要为老人家、细路仔让座。佢就会点点头。

睇网友讨论广州嘅让座，亦有唔少暖心又有趣嘅话题。有位网友话，佢自己钟意让座俾人，不过发现广州唔少阿伯都特别硬朗，经常婉拒人哋好意。呢点我亦好有同感，广州好多老人家都好犀利，有时让座俾佢，佢都会礼貌咁话：“就一两个站，唔使啦。”仲有外地来嘅网友话，唔知道让座俾老人家阵时，该讲普通话定粤语呢。其实，无论你讲咩话，只要让座，啲老人家都会睇得明白，都一样咁开心。

一个礼让嘅城市，总会俾人留下好印象。而礼让亦系有交互作用嘅，互相理解，就会为呢座城市增添温暖。

◎闻歌 媒体人

新闻推荐

1月1日广州新增境外输入确诊病例2例

广州日报讯（全媒体记者伍仞通讯员穗卫健宣）广州市卫健委昨天通报，1月1日0时至24时，广州市报告新增境外输入确诊病例2例。...