海珠湿地有惊喜
白话广州
海珠湿地又有惊喜了。早前，喺粤港澳大湾区海珠湿地植被生态修复科考大赛之中，评委组认定咗两个新物种，分别系鞭檐犁头尖同美冠兰，而且后者仲系国家Ⅱ级保护植物添。
海珠湿地屡有新发现，同呢几年广州嘅努力关系好大——原来，海珠湿地名为“万亩果园”。咁多果树种落，绿化就固然系唔错啦，但同时亦留底咗一啲隐患。
就以2012年为例，当时湿地收归国有，农民唔再大规模耕种，于是湿地就一下子多咗好多外来品种，而且果树仲开始大面积生虫添！历史悠久嘅万亩果园突然失去平衡，呢种现象引起咗植物专家嘅注意。佢哋发现，由于物种太过单一，导致呢度嘅生态系统失去自我修复能力，以至人力一旦退出，果林就开始衰退。
有见及此，专家对湿地生态做咗好多调伏，基本原则就系“顺应自然”。就好似而家街坊睇到嘅咁样：二期湿地会比一期更加野性，人工设施减少，植物规划尽量丰富，营造生物栖息地促进动植物共同繁荣……
经过七八年嘅布局，如今海珠湿地嘅生态系统已经恢复咗稳定发展嘅良性循环。未来，佢将会为广州人带来更多嘅惊喜同快乐。◎梁倩薇 编辑
新闻推荐
广州日报讯（全媒体记者廖靖文通讯员海文）为进一步弘扬勤俭节约传统美德，倡导文明健康生活方式，近日，广州市海珠区赤岗街道...