择日不如撞日
白话广州
“今晚就去食啦，择日不如撞日。”喺广州某公园度，几个师奶一边跳广场舞一边倾偈，听到有人大声咁讲，其他人立即好兴奋咁样，睇白系倾紧相约食嘢。
旧时嘅人，做乜嘢都要拣个日子。加阵约朋友食饭、同学聚会等，亦会大家一齐商定个每人都啱嘅时间。周不时，都会有人迫不及待咁主张，择日不如撞日，就依家或听日啦。呢点，就好似时下好兴嘅“讲走就走嘅旅行”咁，一鼓作气，即兴成行，避免咗时间带来嘅唔确定性。
就攞同学聚会来讲，约定嘅时间离时下越长，“变数”总会越多。前两年，有个朋友话，佢哋班同学准备搞个毕业N周年聚会，倾起个阵，大家兴合合，不过等过咗两个月，真正聚会嘅日子时，参加嘅人先“小猫三两只”。佢好感慨咁话，依家啲人都好忙碌，工作、家庭、娱乐，不一而足，能“抽”到时间，真系相当唔容易。撞日，即时兑现，有时用喺工作上，亦系好嘅策略，避免拖延症嘅出现。
不过讲返转头，择日不如撞日，多少带有一种心血来潮嘅冲动，只适合用喺一啲生活上能轻易实现嘅小事，食餐饭，聚下会，行下街，都无妨。但凡大事，千祈要深思熟虑。◎闻歌媒体人
新闻推荐
广州日报讯（全媒体记者叶卡斯通讯员晴雨）冷空气昨天小试牛刀，广州气温已出现下降。随着新一股中等强度冷空气到来，降温感...