陶豆见证嘅历史
白 话广州
11月13日，广州市文物考古研究院向媒体宣布话，沙岭遗址出土咗距今4000年左右嘅先民生活遗迹，其中最大宗嘅发现就系“陶豆”啦。
“陶豆”究竟系乜？系唔系好似朱古力豆咁“细细粒，容易食”呢？答案当然唔系啦！实际上，“陶豆”嘅核心系“豆”，可以理解为高脚碟、高脚罐、高脚钵等等。如果佢用陶土制成，就做陶豆；如果用青铜制成，就叫做青铜豆啦。
陶豆通常被认为出现喺新石器时代晚期，直到汉代都好流行。所以喺考古嘅时候，陶豆嘅图案、数量等信息会成为判断遗址情况嘅重要参考。
呢次宣布发现嘅陶豆，之前喺附近亦都出土过。比如早前嘅7月，马头庄遗址就清理出17座墓葬，其中唔少随葬品都包含陶豆；2015年11月，榄园岭一个小山岗发现50座古墓，其中西汉时期1座，春秋时期49座，当中好多都随葬咗陶豆或者青瓷豆。而呢啲遗址之间嘅距离其实都唔算好远：开车二十几分钟就到了。由此可见，黄埔呢片区域虽然离历史中心城区有段距离，但早期嘅人类活动同样非常频繁。而小小嘅陶豆，恰恰就系广州呢片大地历史悠久、底蕴深厚嘅有力见证。◎梁倩薇 编辑
新闻推荐
石排将红石山燕岭古采石场遗址的保护纳入美丽幸福村居建设的重点内容，进一步用好、盘活石排红山含翠、古韵悠长的自然和历...