唔做“水鱼”

白 话广州

好多人都话海鲜嘅“水份”大，不过以后买海鲜可以心定啲啦！新闻话，黄沙水产市场正在落重手，其中一招就系，全部商家统一秤；第二招系对呃秤“退一赔三”，情节严重者处以停业整顿甚至清退等。

真系大快人心！黄沙一直系远近驰名嘅海鲜集散地，鱼虾蟹平靓正，唔论本地人外地人，想食海鲜第一时间都会谂起呢度。不过，一粒老鼠屎搞坏一镬粥，之前就有啲商家一边卖鱼一边将顾客当水鱼。虽然大部分商家都遵纪守法，但就系呢啲“个别”，唔单只损害咗顾客嘅利益，对市场嘅声誉亦带来极坏嘅影响。

加阵，监管部门以及唔少市场都有举措，避免顾客成为“水鱼”。乜嘢叫“水鱼”？广州话用呢个词来形容啲容易俾呃嘅人。有人话，系因为水鱼睇上去缩头缩颈，好似十分蠢笨咁；亦有讲法称，水鱼嘅壳软，容易藏水，一揿住就会有水流出来。广州人视水为财，有水出就表示有财到，呢个词咁样解释，唔知啱唔啱。

广州系一个商贸中心，有好多批发城、商贸城，如果佢哋都好似黄沙市场咁，舍得落重手阻吓惩罚啲不良商家，街坊就可以更加安心咁买买买，长远来讲，对商家自己都系有好处嘅。◎闻歌媒体人

新闻推荐

白云湖10公里挑战赛精彩开跑 “体育+科技”融合打造最具科技感赛事

白云湖10公里挑战赛昨日开跑。信息时报记者郭柯堂通讯员云宣摄信息时报讯（记者刘诗敏通讯员云宣）昨日，“大美云湖·竞未...