扮猪食老虎

白话广州

上周，一条新闻令到广州动物园嘅老虎成咗焦点。有网友问，点解里边嘅老虎咁瘦呢，系唔系食唔饱？好彩，动物园及时出来话，里面嘅系华南虎本身就细只，健康饮食都冇问题。

老虎系珍稀动物，否则边个会咁着紧佢哋嘅肥瘦呢！其实，系街坊嘅生活中，“老虎”嘅影子亦无所不在。点解？你听下耳边嘅广州话就会知道。喺广州话里边有唔少同老虎有关嘅俗话。比如，形容啲危险嘅电、水，就叫佢“冇牙老虎”，千祈唔好以为佢哋好虾；对啲脾气臭嘅女人，叫“老虎乸”，事关老虎乸出于保护幼仔嘅母性，有时比公老虎仲威猛。

可见，喺粤语里边，老虎嘅形象系凶恶、威猛嘅。亦有啲人唔信邪，偏要去招惹啲恶势力，相当于“老虎头上钉虱乸”，勇气可嘉，不过亦好牙烟喔。为咗吓窒佢哋，啲犀利嘅人通常会弹出一句话威胁下，“老虎唔发威，你当我病猫？”

当然，有啲人唔会正面从“老虎”嘴里抢食，佢哋会装出一副可怜样，睇定机会“扮猪食老虎”，呢类人比老虎仲可怕。最后系扮猪嘅赢，定系老虎赢，咁就唔知啦。不过听到呢啲话，你就会知道生活中嘅“老虎”，有时俾动物园嘅老虎仲有睇头。◎闻歌 媒体人

新闻推荐

广州开展高层建筑消防实战演练 19楼失火 被困人员扫码快速报警

消防人员进行灭火演练。通讯员供图信息时报讯（记者陈子垤通讯员消宣）为加快破解高层建筑灭火救援难题，提升消防队伍处置...