广州嘅“村”
白话广州
呢排，秋高气爽，唔少街坊得闲都会出外放松下，广州唔少嘅“村”一下就成咗朋友圈刷屏嘅网红。
从化嘅溪头村就系其中一个网红村，事关上周惠清高速通车后，市区去溪头更加快，之前过去差唔多两粒钟，加阵40分钟都唔使。呢度山清水秀，可以徒步竹林睇乡村嘅秋色，透下负离子空气；可以喺野外露营睇月亮星星，听虫叫鸟鸣；玩攰咗，仲可以品尝下好味嘅乡下菜，山坑螺、酿豆腐、走地鸡，真系视觉、舌尖双丰收。
好似溪头咁样嘅村，喺广州仲有唔少，可以话系广州嘅“后花园”。前一排，从化嘅南平村、莲麻村，番禺嘅大岭村仲挂牌“全国乡村旅游重点村”，又为广州嘅乡村游加咗几块金字招牌。
广州系一个现代化嘅大都市，但系接近乡村，仍然系唔少街坊嘅深度需求。山水喺我哋嘅四周，俾街坊记得住乡愁十分重要。远嘅唔讲，就攞细路仔为例，多接触乡村，对植物、动物、山水了解多啲，对学习都有好大个帮助。就算大人，周末一两日去放松身心，亦多咗唔少选择。唔单只对城市居民，旅游亦可以帮助呢啲乡村经济振兴，俾佢哋有更大嘅底气改善自然环境，可谓相得益彰。◎闻歌 媒体人
新闻推荐
广州日报讯（全媒体记者何雪华、林霞虹通讯员粤卫信、穗卫健宣）省卫健委通报，10月23日0~24时，全省新增境外输入确诊病例9...