望到颈都长
白 话广州
“塞到阿妈都唔认得”“等到蚊都瞓”“望到颈都长”……呢几日高速车流量爆棚，唔少出游嘅广州街坊喺朋友圈晒下，一来跟朋友互动，二来亦舒缓一下旅途嘅心情。
广州话里边，好多类似嘅夸张嘅俗话，佢哋用盏鬼嘅形容词，来描述某种情形或某类人。上面讲嘅“阿妈都唔认得”，表示同常态差别好大，本来日日见面最熟悉嘅阿妈都唔认得；“等到蚊都瞓”，蚊本来唔瞓觉嘅，家阵连佢哋都顶唔顺瞓着咗，可见时间有几长；“望到颈都长”，伸头引颈咁等，将条颈都拉长咗，可见期盼嘅程度。
类似嘅俗话仲有唔少，譬如“冇雷公咁远”，远到连雷公都去唔到，你谂有几远。仲有，“口水多过茶”，可以想象啲吹水嘅人，口水花喷喷，不断灌入人哋嘅耳仔？呢句话就唔单只搞笑，仲讽刺咗啲讲话滔滔不绝，夸夸其谈，又或者抢唛争讲，丝毫唔顾旁人感受嘅吹水佬。
呢啲夸张嘅俗语，有啲用生活中常见嘅嘢做为对比，有啲发挥咗奇特嘅想象力。有时，一句盏鬼或者自嘲嘅俗话，化解咗心头几多压力与惆怅，一笑解千愁；有时又辛辣而含蓄咁，讽刺咗身边嘅奇人奇事，入木三分。
◎闻歌 媒体人
新闻推荐
信息时报讯（记者白云）北京时间昨天凌晨，在多哈结束的亚冠联赛西亚区决赛中，伊朗波斯波利斯队经过点球大战以总比分6:4淘汰沙...