欢庆丰收节
白话广州
前日系秋分，2020年中国农民丰收节正式开启。
今年呢个丰收节，广州嘅庆祝活动真系认真丰富。南沙、白云、从化、花都、增城、黄埔等各区都举办咗丰收节嘅活动。最基础嘅，就系特色农产品、瓜果、烧腊、干货呢啲食物展示试吃。好似增城丝苗米、南沙粉藕、从化荔枝蜜……呢啲农产品名片越嚟越多人知道，有啲市民当场就买咗鸡同瓜果，仲后悔冇带埋拖车仔嚟添。
唔少活动现场，仲设置好多农耕体验区，市民可以试下播种、收获嘅乐趣。除咗呢啲，好多新潮嘅模式都有得体验，花都嘅丰收节就有农民朋友亲身上阵做主播带货。增城仲巴闭，出动咗无人收割机嚟收割水稻，5G无人机就现场监测，仲有智能碾米机。唔睇唔知，原来现代农业喺广州已经发展得咁好啦。
今年嘅互动节目入边，有个“农民进城，市民下乡”嘅体验旅游活动就好受欢迎。“进城”嘅节目，可以到花园酒店、中国大酒店呢啲星级酒店，跟啲五星大厨学做粤菜；“下乡”嘅节目，可以行下环保绿道碧道，欣赏下田野风光。呢个系列嘅特色路线有60几条，可以行晒广州11个行政区。
呢啲丰收节活动都将持续到国庆假期，市民大把时间可以去买买买。◎阮栩 编辑
新闻推荐
从化海关关员对出口化妆品实施现场查验。广州海关供图据广州海关统计，今年1—7月，该关关区化妆品出口2.99万吨、1.7亿美元，...